هنحكى النهاردة عن تناقل الكلام بين الناس بلا معنى و بلا دليل
بيتناقل المؤمنين كلام كتير بلا معنى مفهوم يعنى تلاقى حد يحكى عن الروح و يقولك انا بعد الصلاه بحس ان روحى مرتفعه ,, يقولك الامتلاء من الروح ,, يقولك الله ساكن فيكم ,, يقولك تتحد بالله ,, وغيرها كتير من الكلام لدرجة انى مره كنت بتناقش مع واحد و اتكلمنا فى موضوع فايدة الصلاه – زى ما قلنا فى حلقة 7 ان تداخل الله يجعله ظالم و عدم تداخله يصبح بلا قيمة وبعد ما اقر ان صلاته ملهاش فايده عملية – لقيته بيقولى ان صلاته ليها فايده روحية – فقولتله يعنى ايه ؟؟ قاللى لما بتصلى بتمتلىء من الروح ( يقصد الروح القدس اللى قالت عليه اديان زى المسيحية ) – فقولتله انا مفهمتش حاجه – يعنى ايه امتلى بالروح ؟؟ قاللى يعنى تتحد بالله – قولتله انا لسه برضو مأخدتش اى معنى – يعنى ايه اتحد بالله ؟؟ راح قايللى يعنى تمتلى بالروح و قعد كدا حوالى عشر دقايق يقولى تتحد بالله يعنى تمتلىء بالروح و تتحد بالله و فالاخر قاللى بصراحه مش عارف اقولك معنى ليها .. فقولتله يعنى انت بتدرس للاطفال كلام بلا معنى و انت نفسك ناس درستلك كلام بلا معنى و من جيل لجيل عمالين تقولوا كلام بلا معنى .. بتقولى انك بتمتلىء من الروح – طب انت تقدرتعرف امتى تكون ممتلىء بالروح و امتى لأ ؟؟ طب ممتلىء قد ايه ؟؟ طب تعرف تدينى شويه ؟؟ طب تعرف تورينى انت ممتلىء قد ايه ؟؟!! بعدها ساد صمت كتير و قعد يفكر انا كمان عاوز اسألك يعنى ايه روح ؟؟ الانسان مكون من جسد و نفس – لكن يعنى ايه روح ؟؟ و مسئولة عن ايه الروح دى ؟؟ وعرفتها منين ؟؟ الروح دى مينفعش تدركها بحواسك الخمسة – ولا فى اداة علميه تقدر تعرفها – امال انت بتحكى عنها ازاى ؟؟ طب الروح دى مسئولة عن ايه ؟؟ فى اعتقاد شائع عند الناس ان الروح دى هى المسئولة عن الحياه و انها بتفضل بعد موت الانسان 1 – الروح مسئولة عن الحياه – انا هقولك مثال و نشوف لو انا دكتور و بعمل عملية نقل كلى من شخص للتانى – ووسط العملية انا شلت الكلية من الشخص الاول و ماسكها فى ايدى و لسه محطتهاش للمريض التانى – هل الكلية دى هيبقى فيها روح ؟؟ لو قلتلى مفيهاش يبقى الكلية دى ماتت و بالتالى مينفعش انقلها للتانى – ولو قلتلى ان فيها روح طالما خلاياها حيه – طب لما احطها للشخص التانى – هيبقى الشخص التانى دا عنده روح و حته ؟؟ طب مثال تانى – واحد ماشى فالشارع و خبطته عربيه و تم استئصال رجليه يعنى يكاد يكون نص جسمه راح – هل الشخص دى بقى عنده نص روح ؟؟