النهاردة بقى هنكمل حلقتنا و هنتكلم عن الكوارث الطبيعية و عدم حماية الله للبشر من الشر بالنسبة بقى للكوارث الطبيعيةهل الكوارث الطبيعية شر ولا لأ ؟؟
مرة واحد ناقشنى و قاللي , ان اللى مكتوب في اشعياء ان الله خلق الشر . الشر المقصود هنا هو الكوارث الطبيعية . انا معرفش جاب الكلام دا منين , بس كان ردى كالاتي : قولتله الكوارث الطبيعية دى في نظرنا شر ولا خير ؟؟ ان كانت خير , امال ازاى الكتاب وصفها شر و عاقب بيها ناس ؟؟ . وان كانت شر فيبقي المعني ان الله خلق الشر (ايا كان) مختلفش , ويظل الله شرير لانه خلق الشر و فى ناس عندها رأى غريب ان الكوارث الطبيعية هى نتيجة شر الانسان معرفش ازاى الناس دى بتقول كدا اولا لان بفرض ان الكوارث الطبيعية دى نتيجة الشر اللى عمله الانسان – طيب مين اوجد الشر علشان يعمله الانسان ؟؟ يعنى الله برضوا هو اللى خلق الشر تانى حاجه – تيجى نتفق نعمل كارثة طبيعيه ؟ تيجى نتفق نعمل شر فنعمل كارثة طبيعية ؟؟ ازاى الكلام دا يتقال ؟ الكوارث الطبيعية دى نتيجة تغيرات فالطبيعه و ليها تفسير علمى – مثلا الزلزال هى حركة فى الصفائح الصخرية اللى مكونه منها الارض و لو حصل تحركات فالصفائح الصخرية دى اللى موجوده فى قاع المحيطات بيحصل نتيجتها موجه كبيره جدا زى تسونامى مثلاً – و بحسب كلامك ان الله هو اللى مسئول عن الطبيعه فبرضو الله هو اللى بعت الكوارث الطبيعية تعالو نبص على المدن اللى غرقت بسبب تسونامى – هل كل المدن دى اشرار ؟؟ هل المدن دى مفيهاش اطفال ؟؟ هل الاطفال دول برضوا اشرار ؟؟مره كنت بحضر مؤتمر لواحد اسمه ماهر صموئيل وكان بيتكلم عن هلاك الله لسدوم و عمورة ، وقال ان دا كان نتيجة شرهم – ولما حد سأله ايه ذنب الاطفال – فقال تفتكر الاطفال اولاد الناس الاشرار دول لما هيكبروا هيطلعوا ايه ؟ اكيد اشرار انا مش عارف ازاى يقول كدا – رغم ان عنده فالانجيل ناس اتغيرت حياتها من اشرار الى ناس كويسين جدا فى لحظة ، زى شاول الطرسوسى اللى فلحظة بقى من اكبر المبشرين بعد ما كان فاسد وهو اصلا لو ابن الفاسد هيطلع فاسد – يبقى انت كدا بتنفى حرية اختياره انه يطلع فاسد ولا لأ و بالتالى ابن الفاسد اللى يطلع فاسد ميتحاسبش , وبعدين لو الله عارف ان الشخص دا فاسد و هيطلع ابنه فاسد – كان جابه ليه من الاول ؟؟ جابه علشان يشوف فساده و يتمتع بألم الشخص دا وقت الانتقام منه نتيجة فساده ؟؟ فى ناس بتقول ان لازم يكون فى شر علشان يكون فى خير المشكلة يا صديقى ان الحياه كدا وانت اتوجدت لقيت الحياه بالشكل دا – لكن فالاصل دى مش مشكلتى انا دى مشكلة الاله اللى عمل الحياه بالنظام دا – لو بتحكى عن اله كلى القدرة – يبقى كان يقدر يعمل الحياه بشكل مختلف – و ميكونش فيه ان لازم يون فى شر علشان يوضح الخير